MyV3 Appஆடியோ! "நம்மைப் பார்த்து கூகுளும், ட்விட்டரும் நடுங்குகின்றன.. இதெல்லாம் சும்மா"..

MyV3 App ஆடியோ! “நம்மைப் பார்த்து கூகுளும், ட்விட்டரும் நடுங்குகின்றன.. இதெல்லாம் சும்மா”.. அந்த நிறுவனத்தை சேர்ந்தவர்கள் வாடிக்கையாளர்களுக்கு ஆடியோக்களை அனுப்பி வருகின்றனர்.

கோவை: MyV3 App விளம்பர நிறுவனர் சக்தி ஆனந்த் நேற்று கைது செய்யப்பட்டு சிறையில் அடைக்கப்பட்ட நிலையில், அந்த நிறுவனத்தை சேர்ந்தவர்கள் வாடிக்கையாளர்களுக்கு ஆடியோக்களை அனுப்பி வருகின்றனர். அதில், கூகுள், ட்விட்டர் நம்மை பார்த்து பயந்தாங்க , இது ஒரு பிரச்சனையே இல்லை என்று கூறியுள்ளனர்.

கோவையில் செயல்படும் MyV3 App விளம்பர ஆன்லைன் நிறுவனம் மீது கோவை காவல்துறையில் புகார் அளிக்கப்பட்டது. 360 முதல் ரூ.1.20 லட்சம் வரை முதலீடு செய்து, தினமும் பணம் தருவதாகவும், மொபைல் ஆப்பில் விளம்பரம் பார்த்தால் பல மடங்கு சம்பாதிப்பதாகவும் கூறி பொதுமக்களை ஏமாற்றியதாக புகார் எழுந்தது.

செல்போனில்  விளம்பரம் பார்த்து 5 ரூபாயில் இருந்து 1800 ரூபா வரை வருமானம் ஈட்டலாம் எனவும், செலுத்தும் தொகைக்கு ஏற்ப ஆயுர்வேத காப்ஸ்யூல்கள் வழங்கப்படும் எனவும், புதிதாக ஆட்களை சேர்ப்பவர்களுக்கு தனி பணமும் வழங்கப்படும் எனவும் தெரிவிக்கப்பட்டுள்ளது. இதில் ஆயிரக்கணக்கானோர் லட்சக்கணக்கில் முதலீடு செய்துள்ளனர்.

முதலீட்டாளர்களிடம் பல லட்சம் ரூபாய் மோசடி செய்த புகாரின் பேரில், அந்த நிறுவனத்தின் உரிமையாளர் சக்தி ஆனந்த் மீது கோவை போலீஸார் வழக்குப் பதிவு செய்தனர். இதையடுத்து அவருக்கு ஆதரவாக கோவையில் ஆயிரக்கணக்கானோர் திரண்டனர்.

இந்நிலையில், நேற்று காலை கோவை போலீஸ் கமிஷனர் அலுவலகம் வந்த மைவி3 விளம்பர நிறுவன எம்.டி.சக்தி ஆனந்த், சிலர் தங்கள் நிறுவனம் மீது வீண் பழி சுமத்த முயற்சிப்பதாக குற்றம்சாட்டி, ஆதரவாளர்களுடன் தர்ணாவில் ஈடுபட்டார். பலமுறை போலீசார் கூறியும் கலைந்து செல்லாததால் சக்தி ஆனந்த் மற்றும் அவரது ஆதரவாளர்கள் 150க்கும் மேற்பட்டோரை போலீசார் கைது செய்தனர்.

அதன்பின், ரேஸ் கோர்ஸ் போலீசார், சக்தி ஆனந்த் மீது வழக்கு பதிவு செய்து, கோர்ட்டில் ஆஜர்படுத்த, கோர்ட், 15 நாட்கள் நீதிமன்ற காவலில் வைக்க உத்தரவு பிறப்பித்தது. இதையடுத்து சக்திஆனந்த் இரவோடு இரவாக கோவை மத்திய சிறையில் அடைக்கப்பட்டார். திருமண மண்டபத்தில் அடைத்து வைக்கப்பட்டிருந்த அவரது ஆதரவாளர்கள் விடுவிக்கப்பட்டனர்.

இதற்கிடையில், MyV3 App விளம்பர பயன்பாடு நேற்று இரவு முதல் வேலை செய்யவில்லை என்று தெரிகிறது. இதையடுத்து, MyV3 App விளம்பரங்கள் செயலி முடக்கப்பட்டுள்ளதாக தகவல் பரவியது. இதையடுத்து அந்த செயலியை பயன்படுத்தியவர்கள் அதிர்ச்சி அடைந்தனர். இந்நிலையில் இன்று காலை முதல் மீண்டும்  MyV3 App செயல்பட தொடங்கியுள்ளது. இந்த செயலியில் சில கட்டுப்பாடுகள் விதிக்கப்பட்டுள்ளதாக தகவல் வெளியாகியுள்ளது.

இந்நிலையில் MyV3 Adsல் பணிபுரியும் நபர் ஒருவர் தனது வாடிக்கையாளர்களுக்கு ஆடியோ செய்தி ஒன்றை அனுப்பியுள்ளார். MyV3 App விளம்பரங்களுக்கு எதிராக கார்ப்பரேட் நிறுவனங்கள் செயல்பட்டபோது அதை முறியடித்தோம், இப்போது அது ஒரு பிரச்சனையும் இல்லை என்றார். இந்த ஆடியோ வாட்ஸ் அப் குழுக்களில் பரவி வருகிறது.

ஆடியோவில் பேசியவர், “இதை விட பெரிய பிரச்சனைகளை பார்த்திருக்கோம். நம்ம ஆப்பை அறிமுகப்படுத்திய சில நாட்களிலேயே கூகுள் ப்ளே ஸ்டோரில் இருந்து எங்களுடைய ஆப்ஸை நீக்கினார்கள். அது எப்படி இருக்கும் செயல்படுத்த முடியும் என்று  கூகுள் எங்கள் ஆப்பை நீக்கியது. பல லட்சம் பேர் பதிவிறக்கம் செய்துள்ளனர்.

அதன் பிறகு, 2 நாட்களுக்குள் கூகுள் எங்கலிடம் மன்னிப்புக் கேட்டு, பிளே ஸ்டோரில் எங்கள் பயன்பாட்டை மறுவெளியீடு செய்தது. அதன் பிறகு ட்விட்டருக்கும் எங்களுக்கும் பஞ்சாயத்து நடந்தது. ட்விட்டர் லோகோவும் மைவி3 லோகோவும் ஒரே மாதிரியாக இருப்பதுதான் பிரச்சனை. ட்விட்டர் பேசும் குருவி, Myv3 குருவி பாடும் குருவி.

நாங்கள் ஆரம்பத்தில் போராடியது பெரிய நிறுவனங்கள்தான். இப்போது சமூக ஆர்வலர்கள் என்ற பெயரில் வந்திருக்கிறார்கள். MyV3 App ஐ நம்பி கெட்டவர்கள் யாருமில்லை இல்லை, நம்பாத கெட்டவர்கள் லட்சகணக்கில்  இருக்கிறார்கள். எனவே, அச்சம் வேண்டாம். நீங்கள் ஏற்கனவே செய்து வரும் பணியை இன்னும் சிறப்பாக செய்யுங்கள்” என்று ஆடியோவில் கேட்டுக் கொண்டார்.